Mat 7 | AAK | STEP | “Gorɨxo seyí̵ne' enɨ xwɨyí̵á seamearɨnɨgɨnɨrɨ ámá wíyo xwɨyí̵á mumearɨpa e'í̵rɨxɨnɨ.

Matthew 7

Pí̵ne' meararɨgí̵á nánɨ ure'wapɨyiŋí̵ nánɨrɨnɨ.

1 “Gorɨxo seyí̵ne' enɨ xwɨyí̵á seamearɨnɨgɨnɨrɨ ámá wíyo xwɨyí̵á mumearɨpa e'í̵rɨxɨnɨ. 2 Seyí̵ne' ámá wíyo xwɨyí̵á umeararɨgí̵ápa Gorɨxo enɨ xwɨyí̵á seamearɨní̵árɨnɨ. Seyí̵ne' rí̵á tí̵ŋí̵ numearɨrí̵náyí̵, Gorɨxo enɨ rí̵á tí̵ŋí̵ seamearɨní̵árɨnɨ. 3 Seyí̵ne' ‘Í̵wí̵ amɨpí e mepanɨ.’ urɨgí̵ápimɨ dánɨ Gorɨxo apimɨ dánɨ xwɨrɨxí̵ seamení̵árɨnɨ. Joxɨyá í̵wí̵ yarɨŋí̵pɨ sɨŋwí̵yo írí̵ónɨŋí̵ weŋagɨ aiwɨ mɨse'kínarɨŋagí̵nɨŋí̵ dɨxí̵ ámá imónɨŋí̵ wo í̵wí̵ onɨmiápɨ yarɨŋí̵pɨ sɨyikwí̵nɨŋí̵ ŋweaŋagɨ pí nánɨ wɨnarɨŋí̵rɨnɨ? 4 Íkí̵á írí̵ó dɨxí̵ sɨŋwí̵yo weŋáná dɨxí̵ ámá imónɨŋí̵ woyá sɨŋwí̵yo sɨyikwí̵ ŋweaŋagɨ nɨwɨnɨro arɨre ‘Orɨmeámɨnɨ.’ urarɨŋí̵rɨnɨ? 5 Joxɨ naŋí̵ erɨ sɨpí erɨ yarɨŋoxɨnɨ, joxɨyá enɨ írí̵ó urí̵ weŋí̵pɨ xámɨ emɨ nɨmamónɨmáná sɨŋwí̵ píránɨŋí̵ nɨwɨnɨrɨ oyá sɨŋwí̵yo weŋí̵pɨ enɨ ananɨ emɨ umamorí̵ɨnɨ. 6 “Segí̵ memiá odɨpí xwɨrɨŋwí̵ osaxɨpí̵rɨxɨnɨrɨ odɨpí yarɨŋe xwí̵á e mɨtarɨgí̵ápa xwɨyí̵á naŋí̵ Gorɨxoyá enɨ ámá ‘Ayí̵ pí pí̵ne'rí̵anɨ?’ yaiwiarɨgí̵áyí̵ arí̵á nɨwirɨ aí rí̵wí̵mɨnɨ mamopí̵rɨxɨnɨrɨ murɨpa e'í̵rɨxɨnɨ. Sí̵wí sí̵wí̵ nearopí̵rɨxɨnɨrɨ amɨpí naŋí̵ mɨnɨ mɨwiarɨgí̵ápa xwɨyí̵á Gorɨxoyá ámá arí̵á mɨwíí̵áyí̵ xeanɨŋí̵ seaiapí̵rɨxɨnɨrɨ murɨpa e'í̵rɨxɨnɨ.

Gorɨxomɨ rɨxɨŋí̵ urí̵í̵rɨxɨnɨrɨ ure'wapɨyiŋí̵ nánɨrɨnɨ.

7 “Seyí̵ne' Gorɨxomɨ yarɨŋí̵ nɨwiro segí̵ seaimónarɨŋí̵pɨ nánɨ rɨxɨŋí̵ uráná o ananɨ mɨnɨ seaiapɨní̵árɨnɨ. Rɨxɨŋí̵ nurɨrɨ amɨpí wí o tí̵ŋí̵ e dánɨ pí̵ánɨŋí̵ nerí̵ná ananɨ meapí̵rí̵árɨnɨ. Rɨxɨŋí̵ nurɨrɨ wáí̵ e nɨrómáná wakwí̵ óránánɨŋí̵ e'áná Gorɨxo ananɨ arí̵á nɨsirɨ aŋí̵ ówaŋí̵nɨŋí̵ seaí̵kwiiní̵árɨnɨ. 8 Ayí̵ rɨpɨ nánɨ seararɨŋɨnɨ. Ámá ní̵nɨ gɨyí̵ gɨyí̵ yarɨŋí̵ nɨwirɨ wigí̵ wimónarɨŋí̵pɨ nánɨ Gorɨxomɨ rɨxɨŋí̵ nurɨrí̵náyí̵ ananɨ meaarɨgí̵árɨnɨ. Yarɨŋí̵ nɨwirɨ Gorɨxo tí̵ŋí̵ e dánɨ pí̵ánɨŋí̵ nerí̵náyí̵ ananɨ meaarɨgí̵árɨnɨ. Yarɨŋí̵ nɨwirɨ Gorɨxoyá wáí̵ e e'í̵ nɨrómáná wakwí̵ óránánɨŋí̵ e'áná o ananɨ aŋí̵ ówaŋí̵nɨŋí̵ wí̵kwiiarɨŋí̵rɨnɨ. Ayɨnánɨ ananɨ Gorɨxomɨ yarɨŋí̵ wiayíí̵rɨxɨnɨ. 9 Seyí̵ne' re e'í̵ ŋwɨxapɨgí̵áyí̵ne' woxɨ dɨxí̵ íwo aiwá nánɨ rɨxɨŋí̵ rɨráná xeŋwí̵ sí̵ŋá reŋí̵yí̵ nɨmearɨ umeaiarɨŋí̵ranɨ? Oweoɨ! 10 Dɨxí̵ íwo peyí̵ nánɨ rɨxɨŋí̵ rɨráná sidɨrí̵ reŋí̵ nɨmearɨ umeaiarɨŋí̵ranɨ? Ayí̵ enɨ ananɨmanɨ. 11 Seyí̵ne' í̵wí̵ ne'ra warɨgí̵áyí̵ne' aiwɨ segí̵ niaíwí̵ rɨxɨŋí̵ searáná amɨpí awiaxí̵yí̵ mɨnɨ wiarɨgí̵árɨnɨ. E nerɨ aí segí̵ se'no, aŋí̵namɨ ŋweaŋoyí̵ aŋɨpaxí̵rɨnɨ. Gɨyí̵ gɨyí̵ rɨxɨŋí̵ uráná amɨpí naŋí̵pɨ ananɨ mɨnɨ winɨgɨnɨ. 12 Seyí̵ne' ‘Ámá e oneaiípoyɨ.’ nɨyaiwirí̵náyí̵, seyí̵ne' ayo enɨ axí̵pɨ e wiirí̵ɨnɨ. Ŋwí̵ ikaxí̵ Moseso nɨrɨrɨ eaŋí̵pɨ tí̵nɨ xwɨyí̵á wí̵á rókiamoagí̵áwa nɨrɨro eagí̵ápɨ tí̵nɨ apɨ e rɨnɨŋagɨ nánɨ rarɨŋɨnɨ.

Í̵wí inɨŋí̵yau' nánɨ ure'wapɨyiŋí̵ nánɨrɨnɨ.

13 “Í̵wí onɨgí̵ inɨŋí̵yɨkwí̵nimɨ páwianɨro e'í̵rɨxɨnɨ. Ayí̵ rɨpɨ nánɨ seararɨŋɨnɨ. Í̵wí rí̵we'ná Gorɨxo xeanɨŋí̵ winí̵a nánɨ inɨŋí̵yi óí̵ xwe' inɨŋagɨ nánɨ ámá obaxí̵ Gorɨxo nánɨ dɨŋí̵ mɨmó ayimɨ nɨpáwiro wigí̵ dɨŋí̵ tí̵nɨ ne'ra warɨŋoɨ. Ayɨnánɨ seyí̵ne' óí̵ Gorɨxo rí̵we'ná dɨŋí̵ anɨŋí̵ íníná ŋweapí̵rí̵a nánɨ seaiapɨní̵a nánɨ onɨgí̵ inɨŋí̵yɨkwí̵nimɨ páwipí̵rɨ nánɨ anɨŋí̵ miní̵ o rɨŋí̵pimɨ nɨxí̵dɨro e'í̵rɨxɨnɨ.

“Ámá íkí̵ánɨŋí̵ imónɨŋoɨ.” ure'wapɨyiŋí̵ nánɨrɨnɨ.

15 “Mimóní̵ wí̵á rókiamoarɨgí̵áwa wigí̵ dɨŋí̵ ínɨmɨnɨyí̵ sí̵wí sayí̵ sí̵ roarɨŋí̵ yapɨ nimónɨmáná aiwɨ seyí̵ne' tí̵ámɨnɨ nɨbɨrí̵ná sipɨsipí̵ yapí̵nɨŋí̵ awayinɨ yarɨgí̵ápa nimónɨmɨ seaímeapí̵rí̵árɨnɨ. Ayɨnánɨ sɨŋwí̵ tí̵nɨ erí̵ɨnɨ. 16 Seyí̵ne' íkí̵á naŋí̵ we'í̵na nɨwɨnɨrí̵ná ‘Ana naŋí̵narɨnɨ.’ rɨro sɨpí we'í̵na nɨwɨnɨrí̵ná ‘Ana sɨpínarɨnɨ.’ rɨro yarɨgí̵ápa sɨpí imónɨŋí̵ mimóní̵ wí̵á rókiamoarɨgí̵áwa yarɨgí̵ápɨ nɨwɨnɨrí̵ná ‘Yapí̵ rɨneaíwapɨyarɨŋoɨ? Nepa Gorɨxoyáowamanɨ.’ yaiwíí̵rɨxɨnɨ. Ámá yapí̵ seyí̵ne' seaíwapɨyanɨro bí̵áyí̵ ekɨrɨkwí̵nɨŋí̵ imónɨŋoɨ. Wainí̵ sogwí̵ ekɨrɨkwí̵yo darɨgí̵áranɨ? Oweoɨ! Íkí̵á pikí̵ sogwí̵ eŋwɨxí̵yo darɨgí̵áranɨ? Oweoɨ! 17 Rɨpɨ enɨ axí̵pɨrɨnɨ. Íkí̵á naŋí̵yí̵ sogwí̵ naŋí̵ wearɨŋí̵rɨnɨ. Sɨpíyí̵ sogwí̵ sɨpí wearɨŋí̵rɨnɨ. 18 Íkí̵á naŋí̵yí̵ sogwí̵ sɨpí wepaxí̵ mimónɨnɨ. Sɨpíyí̵ sogwí̵ naŋí̵ wepaxí̵ mimónɨnɨ. 19 Íkí̵á ní̵nɨ sogwí̵ naŋí̵ mɨwe'í̵yí̵ nɨdɨkárɨro rí̵á ikeaárarɨgí̵árɨnɨ. 20 Ayɨnánɨ seyí̵ne' íkí̵á sogwí̵yo nɨwɨnɨrí̵ná nɨjí̵á imónarɨgí̵ápa sɨpí imónɨŋí̵ mimóní̵ wí̵á rókiamoarɨgí̵áwa yarɨgí̵ápɨ nɨwɨnɨrí̵ná ‘Gorɨxoyáowamanɨ.’ yaiwíí̵rɨxɨnɨ.

Gorɨxo “Joxɨ nánɨ nionɨ mají̵árɨnɨ.” urɨnɨgɨnɨrɨ ure'wapɨyiŋí̵ nánɨrɨnɨ.

21 “‘Ámá Jisasomɨ “Ámɨnáoxɨnɨ, Ámɨnáoxɨnɨ” urarɨgí̵á ní̵nɨ xegí̵ xano, aŋí̵namɨ ŋweaŋo xwioxí̵yo mɨmeámí̵ nerɨ píránɨŋí̵ umeŋweaní̵e páwipí̵rí̵árɨnɨ.’ mɨyaiwipanɨ. Ámá xí̵o wimónarɨŋí̵pɨ xí̵darɨgí̵á gɨyí̵ gɨyí̵, ayí̵nɨ nɨpáwiro ŋweapí̵rí̵árɨnɨ. 22 Sí̵á Gorɨxo ámá nɨyonɨ mí ómómɨxɨmí̵ ení̵áyimɨ ámá obaxí̵ re nɨrayipí̵rí̵árɨnɨ, ‘Ámɨnáoxɨnɨ, Ámɨnáoxɨnɨ, nene yoí̵ joxɨyáyo dánɨ xwɨyí̵á wí̵á rókiamoagwárɨnɨ.’ nɨnɨrɨro ‘Yoí̵ joxɨyáyo dánɨ imí̵ó mɨxí̵ umáɨnowáragwárɨnɨ.’ nɨnɨrɨro ‘Yoí̵ joxɨyáyo dánɨ emɨmí̵ obaxí̵ wíwapɨyagwárɨnɨ.’ nɨnɨrɨro epí̵rí̵á eŋagɨ aiwɨ 23 ámá nɨyí̵yá sɨŋwí̵ anɨgí̵e dánɨ re urɨmí̵árɨnɨ, ‘Seyí̵ne' nánɨ nionɨ nɨjí̵á wí mimónɨŋɨnɨ. Rɨkɨkɨrí̵ó yarɨgí̵áyí̵ne' nionɨ pí̵nɨ nɨnɨwiárɨmɨ u'poyɨ.’ urɨmí̵árɨnɨ.

Aŋí̵ mɨrarɨgí̵íwau' nánɨ ure'wapɨyiŋí̵ nánɨrɨnɨ.

24 Ámá gɨyí̵ gɨyí̵ nionɨyá xwɨyí̵á rɨpɨ arí̵á nɨnirɨ xɨxenɨ e nɨnɨxí̵dɨrí̵náyí̵ ayí̵ ámá sí̵ŋá aŋí̵ nɨmɨrɨrí̵ná dɨŋí̵ píránɨŋí̵ neŋwɨperɨ xwí̵á nɨmiga nɨwerɨ sí̵ŋá piárá ínɨmɨ yapɨnɨŋí̵namɨ dánɨ sí̵ŋá piárá aŋí̵ mɨrɨní̵ápɨ e dánɨ nɨkɨkíróa nɨyapɨrɨ mɨrarɨŋónɨŋí̵ imónɨŋoɨ. 25 Iniá earɨ iniɨgí̵ waxí̵ xwe' weapɨrɨ rí̵wɨpí erɨ nerɨ aiwɨ aŋiwá sí̵ŋá ínɨmɨ yapɨnɨŋí̵namɨ dánɨ nɨkɨkíróga yapɨnɨŋagɨ nánɨ mɨkwierómioaŋɨnigɨnɨ. 26 Ámá gɨyí̵ gɨyí̵ xwɨyí̵á nionɨ rarɨŋápɨ arí̵á nɨniro aí xɨxenɨ mepa nerí̵náyí̵ ayí̵ ámá sí̵ŋá aŋí̵ nɨmɨrɨrí̵ná majɨmají̵á nikárɨnɨrɨ inɨkíyo seáyɨ e dánɨ sí̵ŋá nɨkɨkíróa nɨyapɨrɨ mɨrárarɨŋónɨŋí̵ imónɨŋoɨ. 27 Iniá earɨ iniɨgí̵ waxí̵ weapɨrɨ rí̵wɨpí erɨ yarí̵ná aŋiwá nɨkwierónowirɨ rɨwí̵ nɨra pie'roŋɨnigɨnɨ.” Jisaso e nurɨrɨ 28 xwɨyí̵á apɨ nɨpɨnɨ rɨxa nɨra nu'ɨsáná eŋáná ámá e epí̵royí̵ egí̵áyí̵ o ŋwí̵ ikaxí̵ eánɨŋí̵pɨ mewegí̵áwa ure'wapɨyarɨgí̵ápa mure'wapɨyí ne'ní̵ tí̵ŋónɨŋí̵ ure'wapɨyarɨŋagɨ nánɨ ududí̵ ne'ra ugí̵awixɨnɨ.